ၶွင်ႇသီႇဢဝ်ၶိုၼ်းၸိုင်ႈတႆး (RCSS/SSA) လႄႈ ပႃႇတီႇၸၢဝ်းၶိူဝ်းတဢၢင်း(TNP) ႁူမ်ႈသင်ၶ ၸဝ်ႈတဢၢင်းၸတ်းႁဵတ်းပၢင်ႁူပ်ႉထူပ်းၵၼ်တီႈၵဵင်းမႆႇ
September, 14, 2016
ၼင်ႇႁိုဝ်တေၵေႈလိတ်ႈလႆႈလွင်ႈပတိၵ်ႈၶၢတ်ႈ
ပၢင်တိုၵ်းၼႂ်းၵေႈၵၢင် တပ်ႉသိုၵ်းၸိုင်ႈတႆး RCSS/SSA လႄႈ တပ်ႉသိုၵ်းတဢၢင်း TSLF/TNLA ၼႆသေ ယူႇတီႈၶွင်ႇသီႇဢဝ်ၶိုၼ်းၸိုင်ႈတႆး တပ်ႉသိုၵ်းၸိုင်ႈတႆး
(RCSS/SSA)
လႄႈ ပႃႇတီႇၸၢဝ်းၶိူဝ်းတဢၢင်း TNP ႁူမ်ႈလူၺ်ႈ သင်ၶၸဝ်ႈၸၢဝ်းၶိူဝ်းတဢၢင်းသေ လႆႈၸတ်းႁဵတ်းပၢင်ႁူပ်ႉထူပ်းၵၼ်
တီႈႁူင်းႁႅမ်း ႁေႃးရီးတေႊ ၵဵင်းမႆႇၸိုင်ႈထႆး။
ၵဵဝ်ႇလူၺ်ႈလွင်ႈလႆႈၸတ်းႁဵတ်းပၢင်ႁူပ်ႉထူပ်းၵၼ်ၼႂ်းဝၼ်းထိ
12/9/2016 ၼႆႉသေ ၸဝ်ႈသိုၵ်းလူင်ၸၢႆးငိုၼ်း
ၽူႈမီးပုၼ်ႈၽွၼ်းၽၢႆႇၵေႃႇၵၢႆႇလွင်ႈငမ်းယဵၼ် ၶွင်ႇသီႇဢဝ်ၶိုၼ်းၸိုင်ႈတႆး တပ်ႉသိုၵ်းၸိုင်ႈတႆး
(RCSS/SSA)ပွၵ်ႈလၢတ်ႈတီႈသိုဝ်ႇၶၢဝ်ႇတႆးထီးၼၼ်ႉဝႆႉၼင်ႇၼႆ။
ဢိင်ၼိူဝ်မိူဝ်ႈၵႂႃႇၶိုၼ်ႈႁွတ်ႈပၢင်ၵုမ်လူင်ပၢင်လူင်
ႁူဝ်ပၢၵ်ႇ 21 တီႈၼေႇပျီႇတေႃႇၼၼ်ႉသေ
ၽၢႆႇႁဝ်းၶႃႈၸဝ်ႈၵွင်ၶိူဝ်း လႄႈ ၽၢႆႇပႃႇတီႇၸၢဝ်းၶိူဝ်းတဢၢင်း TNP ၽူႈၶဝ်ႈပႃႇတီႇဢွၼ်ႁူဝ် တႃႉလႃႉၽေႇ မီးတိုဝ်ႉတၢင်းလႆႈႁူပ်ႉထူပ်းၵၼ်သေ
လႆႈၸႂ်ၵၼ်ဝႃႈ ႁဝ်းထုၵ်ႇလီ ၸတ်းႁဵတ်းပၢင်ႁူပ်ႉထူပ်းၵၼ်ယူႇၼႆသေ
ၸင်ႇလႆႈၶိၼ်းၵၼ်မႃးၸတ်းႁဵတ်းပၢင်ၵုမ် ဢုပ်ႇဢူဝ်းၵၼ်တီႈၵဵင်းမႆႇ ပွၵ်ႈၵမ်းၼႆႉ ယိူင်းဢၢၼ်းလူင်လွင်ႈလႆႈၸတ်းႁဵတ်းပၢင်ႁူပ်ႉထူပ်းၵၼ်ပွၵ်ႈၼႆႉၵေႃႈ
တွၼ်ႈတႃႇတေမီးလွင်ႈၸမ်ၸႂ်ၵၼ် လႄႈ ၵေႈလိတ်ႈပၼ်ႁႃၼႂ်းၵေႈၵၢင် RCSS
/SSA လႄႈ PSLF/TNLA ဢၼ်ပဵၼ်ပၢင်တိုၵ်းၵၼ်ယူႇပွတ်းႁွင်ႇ
ၸိူဝ်းၼၼ်ႉသေၸင်ႇလႆႈပဵၼ်မႃးပၢင်ႁူပ်ႉထူပ်းၵၼ်။
ၽူႈၶိုၼ်ႈႁွတ်ႈၼႂ်းပၢင်ႁူပ်ႉထူပ်းဢုပ်ႇဢူဝ်းၵၼ်ပွၵ်ႈၵမ်းၼႆႉ
မီးၽူႈၶဝ်ႈႁူမ်ႈ ၶွင်ႇသီႇဢဝ်ၶိုၼ်းၸိုင်ႈတႆး တပ်ႉသိုၵ်းၸိုင်ႈတႆး (RCSS/SSA)
မီးႁူဝ်ပဝ်ႈလူင် ၸွမ်သိုၵ်းယွတ်ႈသိုၵ်း၊ ၵႅမ်ၸွမ်ႁၢၼ်ပွင်ၶိူဝ်း၊ ၸွမ်ႁၢၼ်ၸၢႆးယီႈ၊ ၸဝ်ႈသိုၵ်းၸၢႆးငိုၼ်း၊ ၸဝ်ႈပိုၼ်ၶမ်း ၽူႈၵိူဝ်းၵုမ် (RCSS/SSA) ၸဝ်ႈၶိုၼ်းသႂ် ၶဝ်ၸဝ်ႈၸိူဝ်းၼႆႉ။
ၾၢႆႇပႃႇတီႇ
ၸၢဝ်းၶိူဝ်းတဢၢင်း TNP မီးၽူႈပွင်ၵၢၼ်ငဝ်ႈငုၼ်း
တႃႉဢေးမွင်ႇ လႄႈတႃႉလႃႉၽေႇ
ၾၢႆႇသင်ၶ ၸဝ်ႈမီး
မုၵ်ႉၸုမ်းသင်ၶၸဝ်ႈတဢၢင်းပတ်းပိုၼ်ႉမိူင်းမၢၼ်ႈ ၵႅမ်ႁူဝ်ပဝ်ႈဢူးပၺ်ၺႃႇသီရိ
ၽူႈၼမ်းၼႂ်း ဢူးတႅၵ်ႉၶိၺႃၼ တင်းၵူၼ်းၼုမ်ႇတဢၢင်းမွၵ်ႈ 10 ၵေႃႉမႃးၶဝ်ႈႁူမ်ႈၼႆၶႃႈယဝ်ႉ။
