ၸုမ်းယိပ်းၵွင်ႈၵၢင်ႇလွႆ TNLA လႄႈ ၶၢင် KIA ႁေႉဢိုတ်းလူတ်ႉၵႃးၵဵပ်းငိုၼ်း ယိုဝ်းမၢၵ်ႇၵႃးၵူၼ်းမိူင်း ၸိူဝ်းၵႂႃႇမႃးၼိူဝ်သဵၼ်ႈတၢင်းလူင်မူႇၸေႈလႃႈသဵဝ်ႈ
ၵေႃသိုဝ်ႇၶၢဝ်ႇၵူၼ်းမိူင်းတႆး/ၸၢႆးဢွင်ႇမိူင်း
16/3/2017
ၸုမ်းယိပ်းၵွင်ႈၵၢင်ႇသိုၵ်းဢူၺ်းလီပွတ်းႁွင်ႇ သိုၵ်းလွႆ TNLA လႄႈ သိုၵ်းၶၢင် KIA ႁူမ်ႈၵၼ်ႁေႉဢိုတ်း လူတ်ႉၵႃး ပိၵ်ႉသဵၼ်ႈတၢင်းလူင်မူႇၸေႈ
လႃႈသဵဝ်ႈ ႁိမ်းဝၢၼ်ႈၼမ်ႉၽၵ်းၵႃ ၸေႈဝဵင်းၵူတ်ႉၶၢႆ ၸိုင်ႈတႆးပွတ်းႁွင်ႇ သေၵဵပ်းငိုၼ်းၸဝ်ႈလူတ်ႉဢမ်ႇၵႃးယိုဝ်းပႃးမၢၵ်ႇယၢင်လူတ်ႉၵႃးတၢင်ႇၵုၼ်ႇၵူၼ်းမိူင်းၸိူဝ်းလႅၼ်ႈၵႂႃႇမႃးၼိူဝ်သဵၼ်ႈတၢင်းလူင်။
မိူဝ်ႈဝၼ်းထီႉ 15/3/2017 ၶၢဝ်းယၢမ်းၵၢင်ၼႂ် 8:00 မူင်းပၢႆၼၼ်ႉ ၸုမ်းသိုၵ်းလွႆ TNLA လႄႈ ၸုမ်းသိုၵ်းၶၢင် KIA ပႃးၵွင်ႈၸေးမိုဝ်း ၶူဝ်းသိုၵ်းတဵမ်ၸုမ်ႇသေ
ႁေႉဢိုတ်းလူတ်ႉၵႃး ၸိူဝ်းလႅၼ်ႈၵႂႃႇမႃးၼိူဝ်သဵၼ်ႈတၢင်းလူင် မူႇၸေႈ-လႃႈသဵဝ်ႈၽၢႆႇၼိူဝ်ၼမ်ႉၽၵ်းၵႃ ၼႂ်းၵႄႈၵၢင်မူႇဝၢၼ်ႈၼမ်ႉၵွတ်ႈ
လႄႈမူႇဝၢၼ်ႈၼႃးၼွႆႉ ၼႂ်းၸေႈဝဵင်း ၵူတ်ႉၶၢႆ ၸိုင်ႈတႆးပွတ်းႁွင်ႇ
ၵဵပ်းငိုၼ်းၸဝ်ႈလူတ်ႉၸဝ်ႈၵႃးယဝ်ႉဢမ်ႇၵႃးထိုင်မႃးၶၢဝ်းယၢမ်းၵၢင်ဝၼ်း 2:00 ပၢႆၼၼ်ႉဢဝ်ၵွင်ႈယိုဝ်းပႃး
မၢၵ်ႇၵႃးလူတ်ႉၵႃးၵူၼ်းမိူင်းပွင်ႇႁဵတ်းႁႂ်ႈလူတ်ႉၵႃးတိတ်းၸပ်းၵၼ်ႁိုင်ယၢဝ်း 3 ၸူဝ်ႈမူင်း ဝႃႈၼႆ။
ၵူၼ်းႁေႃႈၵႃးၵေႃႉၼိုင်ႈလၢတ်ႈဝႃႈ
“ၶဝ်ၸႂ်ႉၵူၼ်းႁေႃႈၵႃးလူင်းၵႃးဢမ်ႇၵႃး ႁုပ်ႈယိုတ်းဢဝ်သေႃးၵႃး ပႃးၸဵမ် ၽူင်းတိတ်းတူဝ်ၸိူဝ်းၼႆႉ
မၢင်လမ်းၸိူဝ်းပဵၼ်ၵႃးတၢင်ႇၵုၼ်ႇၼၼ်ႉၵေႃႈ ထုၵ်ႇၶဝ်ဢဝ်ၵွင်ႈယိုဝ်း မၢၵ်ႇၵႃး ပွင်ႇသေ
ႁဵတ်းႁႂ်ႈလူတ်ႉၵႃးဢၼ်ယူႇတၢင်းလင်ဢမ်ႇၸၢင်ႈတူင်ႉၼိုင်ၵႂႃႇလႆႈ ၸဵမ်လူတ်ႉၵႃးဢၼ်ၶိုၼ်ႈလႄႈဢၼ်လူင်း
လၢတ်ႈဝႃႈတၢင်းၼႃႈမီးပၢင်တိုၵ်းၼႆသေ တီႈတေႉၵေႃႈဢမ်ႇႁၼ်မီးပၢင်တိုၵ်းသင်’’ ဝႃႈၼႆ။
သိုပ်ႇလၢတ်ႈထႅင်ႈဝႃႈ “ၵႃးၸိူဝ်းဢၼ်ထုၵ်ႇၶဝ်ၵဵပ်းငိုၼ်းၸိူဝ်းၼၼ်ႉပေႃးပဵၼ်ၵႃးဢွၼ်ႇလႆႈထုၵ်ႇၸုမ်းၶဝ်
ၵဵပ်းငိုၼ်း ၼိုင်ႈလမ်းလႂ်
သၢမ်မိုၼ်ႇပျႃးတေႃႇထိုင်ႁႃႈမိုၼ်ႇပျႃး ပေႃးပဵၼ်လူတ်ႉၵႃးတၢင်ႇၵူၼ်းတၢင်ႇၵုၼ်ႇသမ်ႉ
ၵဵပ်းၼိုင်ႈသႅၼ်ပျႃး တေႃႇထိုင်
သၢမ်သႅၼ်ပျႃး’’ၼႆယဝ်ႉ။
ၵႃးၸိူဝ်းဢၼ်လႆႈထုၵ်ႇယိုဝ်းၼၼ်ႉ
ၵႃးတၢင်ႇၵုၼ်ႇ မၢၵ်ႇ 22
လေႃႉ 4 လမ်း၊ မၢၵ်ႇ 10 လေႃႉ 1 လမ်း၊ မၢၵ်ႇ 6 လေႃႉ 1 လမ်း၊ ၵႃးတၢင်ႇဢွၼ်ႇ 1 လမ်း။
ၸုမ်းသိုၵ်းလွႆ(တဢၢင်း) PSLF/TNLA လႄႈ ၸုမ်းသိုၵ်းလွတ်ႈလႅဝ်းသဝ်းၶေႃၶၢင် KIA ၼႆႉ ပဵၼ်လုၵ်ႈၸုမ်း ဢူၺ်းလီ UNFC သေပဵၼ်ၸုမ်းဢၼ်ဢမ်ႇပႆႇလႆႈလူင်းလၢႆးမိုဝ်းၵိုတ်းယိုဝ်း လိၵ်ႈႁူမ်ႈမၢႆ NCA လႄႈ
ၶဝ်ႈပႃး ၼႂ်းၸုမ်းၵေႃႇၵၢၼ်ႁၢႆႉဢၼ်လူင်ပွင်ၸိုင်ႈမိူင်းတႆးမၵ်းမၼ်ႈၵႂႃႇ
မိူဝ်ႈဝၼ်းထီႉ 7/12/2016 တီႈႁူင်းႁေႃ သၽႃးမိူင်းတႆး ဝဵင်းလူင်တူၼ်ႈတီး ၼႆယဝ်ႉ။
