ၵူၼ်းဝၢၼ်ႈဢိူင်ႇၶိူဝ်းၼိမ်းလႄႈ ဢိူင်ႇၼမ်ႉပွင်ႈ ၸေႈဝဵင်း ဝဵင်းလႃႈသဵဝ်ႈ တုၵ်းယွၼ်းၶိုၼ်းတီႈလိၼ် ဢၼ်ၺႃးသိမ်းဢဝ်

ၵေႃသိုဝ်ႇၶၢဝ်ႇၵူၼ်းမိူင်းတႆး 17/07/2017

ဝၼ်းထိ 16 လိူၼ်ထူၼ်ႈ 7 ပီ 2017 ၼီႈမိူဝ်ႈၼႆႉ ယၢမ်း 10:00 မူင်း ၵူၼ်းဝၢၼ်ႈၼႂ်းဢိူင်ႇၶိူဝ်းၼိမ်းလႄႈ ဢိူင်ႇၼမ်ႉပွင်ႈ ၸေႈဝဵင်းလႃႈသဵဝ်ႈ ဢဵၼ်ႁႅင်းမွၵ်ႈ 400 ပၢႆ  ဢွၼ်ၵၼ်ၶွမ်ႈ ၶတ်းၼႄၵၢင်ၸႂ် တႃႇတေလိုပ်ႈဢွၵ်ႇဢူး​​​လေးမိၼ်ႉ ​​​ၵေႃႉဢၼ်မႃးတဵၵ်းတဵင်ၸႂ်ႉႁႂ်ႈၵူၼ်းဝၢၼ်ႈလူင်းလၢႆးမိုဝ်းပၼ်တီႈလိၼ်ဢၼ်လူင်ပွင်ၸိုင်ႈ သိမ်းၵႂႃႇ ​လႄႈတႃႇႁႂ်ႈၼႃႈလိၼ်တင်းသဵင်ႈၶိုၼ်းၽႅဝ်ၼႂ်းမိုဝ်းၵူၼ်းဝၢၼ်ႈတင်းသဵင်ႈ။

Photo TYO

ၸၢႆးႁၢၼ် ႁူဝ်ၼႃႈၸုမ်းၵူၼ်းၼုမ်ႇတႆး TYO ပွတ်းႁွင်ႇ လၢတ်ႈၼႄၵေႃသိုဝ်ႇၶၢဝ်ႇ ၵူၼ်းမိူင်း တႆးဝႃႈ  - တီႈလိၼ် ၵူၼ်းဝၢၼ်ႈၶဝ်ၼႆႉ လႆႈၺႃးလူင်ပွင်ၸိုင်ႈသိမ်းဢဝ် ၸဵမ်မိူဝ်ႈ ပူၼ်ႉမႃး ပီ2002 ။ ဝၢႆးသေၼၼ်ႉ ထိုင်မႃးပၢၼ်လူင်ပွင်ၸိုင်ႈမႂ်ႇ ဢွၵ်ႇမၢႆမီႈဝႃႈ တီႈလိၼ်ဢၼ်ၶဝ်သိမ်းဝႆႉၼၼ်ႉ ပေႃးဢမ်ႇလႆႈၸႂ်ႉတိုဝ်း ႁႂ်ႈပၼ်ၶိုၼ်းၵူၼ်းဝၢၼ်ႈ ၼႆသေတႃႉ ၽူႈႁၢပ်ႇၵၢၼ်ပႃႈတႂ်ႈၶဝ် ဢမ်ႇႁဵတ်းၸွမ်းမၢႆမီႈ ၊ သေယဝ်ႉ မေးၶၢတ်ႈၵိၼ်ထႅင်ႈ။

Photo TYO

ၸၢႆးႁၢၼ်သိုပ်ႇလၢတ်ႈထႅင်ႈဝႃႈ - မိူဝ်ႈႁၢမ်းသုၼ်ႇယူႇၼၼ်ႉ ၵူၼ်းဝၢၼ်ႈၸင်ႇလႆႈၵပ်းသိုပ်ႇယွၼ်းတၢင်းၸွႆႈထႅမ်  ၸိုဝ်ႈႁွင်ႉဢူး​​​​ထေးလုၼ်ႇ မႃးၸွႆႈတိူင်ႇလၢတ်ႈပၼ် လူင်ပွင်ၸိုင်ႈၵူႈၸၼ်ႉၸၼ်ႉသေ ၸမ်လႆႈၶိုၼ်းတီႈလိၼ်မႃး။ ၵူၺ်းၵႃႈ​​လိၵ်ႈ ဢၼ်လူင်ပွင်ၸိုင်ႈသင်ႇႁႂ်ႈပၼ်တီႈလိၼ်ၵူၼ်းဝၢၼ်ႈၶိုၼ်းၼၼ်ႉဢမ်ႇလူင်းမႃးထိုင် ဝၢႆးၼၼ်ႉဢူး​​ထေးလုၼ်ႇၸင်ႇႁွင်ႉဢူး​​​လေးမိၼ်ႉမႃးၸွႆႈ    ဢူး​​လေးမိၼ်ႉသမ်ႉမႃးလႅၼ်​​​ေၵျႃးဢဝ်ဝ်တီႈလိၼ်ၵူၼ်းဝၢၼ်ႈ  ။ ဢူး​​​ေလးမိၼ်ႉလႅၼ် ႁႂ်ႈၵူၼ်းဝၢၼ်ႈ လူင်းလၢႆးမိုဝ်းပၼ်တီႈလိၼ်၊ သေယဝ်ႉ ဢဝ်ၵူၼ်းတၢင်ႇတီႈ ၶၢႆႉမႃးယူႇ ႁဵတ်းၵႅင်ႈဝႃႈ ပဵၼ်ၵူၼ်းပၢႆႈၽေး ။ ယွၼ်ႉပိူဝ်ႈ မီးပၼ်ႁႃတၢင်းယၢပ်ႇၸိူင်ႉၼႆ ၸင်ႇလႆႈမႃးတိူင်ႇလၢတ်ႈ ယွၼ်းတၢင်းၸွႆႈထႅမ်တီႈ ၸုမ်းၵူၼ်းၼုမ်ႇၶဝ်မႃး ၼႆၶႃႈယဝ်ႈ ။

ၸွမ်းၼင်ႇ ၵူၼ်းဝၢၼ်ႈၶဝ် မႃးယွၼ်းတၢင်းၸွႆႈထႅမ်ၼၼ်ႉသေ ၸုမ်းၵူၼ်းၼုမ်ႇၶဝ် လႆႈႁဵတ်းပၢင်ၵုမ် ၸွမ်းၵူၼ်းဝၢၼ်ႈ မိူဝ်ႈပူၼ်ႉမႃးဝၼ်းထိ 9 လိူၼ်ထူၼ်ႈ 7 ပီ 2017 ၼီႈ ။ သေယဝ်ႉ လႆႈႁႃလွၵ်းလၢႆးတႃႇတေလႆႈၶိုၼ်းတီႈလိၼ် ၵူၼ်းဝၢၼ်ႈၶိုၼ်း။

ၼႂ်းဝၼ်းမိူဝ်ႈၼႆႉၵေႃႈ လႆႈၼႄၵၢင်ၸႂ်သၢၼ်ၶတ်း ၵူၼ်းၵဝ်းလႅၼ်ဢဝ်တီႈလိၼ်ၶဝ် ၊ သေယဝ်ႉ မီးၶေႃႈတုၵ်းယွၼ်း လၢႆလၢႆၶေႃႈ ။ သေယဝ်ႉ လႆႈဢဝ်လိၵ်ႈတၢင်ႇထိုင်ပႃး တီႈႁွင်ႈၵၢၼ်လူင်ၽႆၢႇဢုပ်ႉပိူင်ႇ ၶဝ်။

ဢွင်ႈတီႈလိၼ် ဢးဢူး​​​ေလးမိၼ်ႉပႅတ်ႉလႅၼ်သိမ်းဢဝ်  မီးၽၢႆႇၸၢၼ်း ဝဵင်းလႃႈသဵဝ်ႈ ယၢၼ်ၵႆမွၵ်ႈ  16 လၵ်း ၊ တၢင်းၵႂၢင်ႈတင်းသဵင်ႈ မီး 200 ဢေႇၵ ။

ပဵၼ်တီႈလိၼ်ၵူၼ်းဝၢၼ်ႈ ဝၢၼ်ႈပႅၼ်ႈ ၊ မိူင်းမေႃး ၊ ၵွင်းလၢင်း ဢိူင်ႇၼမ်ႉပွင်ႈ လႄႈတင်း ၵူၼ်းဝၢၼ်ႈ ၵွင်းယူမ်း ဢိူင်ႇၶိူဝ်းၼိမ်း ၼႆၶႃႈယဝ်ႈ ။

ၵူၼ်းဝၢၼ်ႈ လၢတ်ႈဝႃႈ တီႈလိၼ်ၼႆႉ ၶဝ်လႆႈၽုၵ်ႇၵိၼ် ၽုၵ်ႇယႅမ်ႉမႃး ၸဵမ်မိူဝ်ႈပၢၼ်ပူႇမွၼ်ႇၼၢႆးယႃႈ ပၢၼ်သိုပ်ႇပၢၼ် ။ ၵွပ်ႈၼႆ ၵႃႈၸူဝ်ႈ ၶဝ်ပႆႇလႆႈၶိုၼ်းတီႈလိၼ်ၶဝ်ၼႆႉ တေသိုပ်ႇတုၵ်းယွၼ်း / တူင်ႉၼိုင်ၵႂႃႇ တေႃႇပေႃးၶိုၼ်းလႆႈ ၊ ပုၼ်ႈတႃႇ တေလႆႈသိုပ်ႇပုတ်ႈပၼ် လုၵ်ႈလၢၼ်လိၼ်လႅၼ်ၶဝ်ၵႂႃႇမိူဝ်းၼႃႈ  ၼႆၶႃႈယဝ်ႈ ။