ၾႆးမႆႈတီႈဝတ်ႉၵျႂင်းတေႃးယႃႉ ဝဵင်းလႃႈသဵဝ်ႈ
ဝၼ်းထိ 13 လိူၼ်ထူၼ်ႈ 8 ပီ 2017 ၼီႈ မိူဝ်ႈၼႆႉ
ယၢမ်းၵၢင်ၼႂ် 10 မူင်းပၢႆ ပဵၼ်လွင်ႈၾႆးမႆႈ တီႈဝတ်ႉၵျႂင်းၵမ်ႇမထၢၼ်း ဢၼ်မီးၼႂ်းပွၵ်ႉသိပ်း ဝဵင်းလႃႈသဵဝ်ႈ
ၸိုင်ႈတႆးပွတ်းႁွင်ႇ
။
ၸဝ်ႈၶူး သုမၼ ၸဝ်ႈၵွၼ်းဝတ်ႉ
လၢတ်ႈၼႄၸုမ်းငဝ်းႁၢင်ႈသဵင်တႆးဝႃႈ
တီႈဢၼ်ၾႆးမႆႈၼၼ်ႉ
ပဵၼ်ဝတ်ႉ မုင်းလဵၵ်း ၊ ၵေႃႇဢုတ်ႇ
၊ မီးႁွင်ႈလုၵ်း 9 ႁွင်ႈ
။ ၸဝ်ႈသၢင်ႇ 20 ပႃး လႄႈ
မုၼ်ၸၢင်းပႃးၼိုင်ႈ
ယူႇဝႆႉသေ
မိူဝ်ႈၾႆးမႆႈၼၼ်ႉ
ၸဝ်ႈသၢင်ႇၶဝ် တိုၵ်ႉၵႂႃႇၶိုၼ်ႈလိၵ်ႈ/ႁဵၼ်းလိၵ်ႈ ယူႇလႄႈ ဢမ်ႇမီးၽႂ်ယူႇ ။
ပေႃးဝႃႈမၼ်း ၸဝ်ႈမုင်ႈႁၼ်ပဵဝ်ၾႆးၼႆၵေႃႈ / ၼႅတ်ႈၵပ်းသိုပ်ႇ ၸုမ်းၶႄမွတ်ႇၾႆးၶဝ် ၊ လူတ်ႉၶႄမွတ်ႇၾႆး
မႃးမွၵ်ႈ ႁႃႈလမ်း ၊ ပႃးတင်းၵူၼ်းၼႂ်းပွၵ်ႉၼႂ်းယွမ်ႇၶဝ်
ဢွၼ်ၵၼ်ၶႄမွတ်ႇလႄႈ
ထိုင်မႃးမွၵ်ႈ 11 မူင်းၾႆးၸင်ႇမွတ်ႇယဵၼ်လူင်းၵႂႃႇ ။ လွင်ႈတၢင်းဢၼ်ၾႆးလႆႈမႆႈတႄႉ
ပဵၼ်ယွၼ်ႉပိူဝ်ႈ ၶိူင်ႈထရၢၼ်ႇသ်ၾေႃႇမိူဝ်ႇ ဢၼ်ပဵၼ်ၸၢၵ်ႈဢၼ်တၢင်ႇႁႅင်းၾႆးၾႃႉ ၵိုင်ႉၵၢင်ႉႁႅင်းသုင်သေ ၸင်ႇလႆႈ မႆႈၵႂႃႇ ၼႆၶႃႈယဝ်ႈ ။
မၼ်းၸဝ်ႈသိုပ်ႇလၢတ်ႈထႅင်ႈဝႃႈ မိူဝ်ႈၾႆးမႆႈၼၼ်ႉ
ယွၼ်ႉဢမ်ႇမီးၽႂ်ယူႇၼႂ်းဝတ်ႉလႄႈ
ဢမ်ႇမီးၽႂ် လႆႈတိူဝ်ႉဝၢတ်ႇၸဵပ်းသေတႃႉ မီးမုၼ်ၸၢင်းၵမ်ႈၽွင်ႈ ဢၼ်ၵႂႃႇတေႃႉၶူဝ်းဢွၵ်ႇၼၼ်ႉ လႆႈတိူဝ်ႉဝၢတ်ႇ ၸဵပ်း ဢိတ်းဢွတ်း
၊ ၶူဝ်းၼႂ်းဝတ်ႉတႄႉ မႆႈၵႂႃႇသဵင်ႈမူတ်း၊
ၸဵမ်ၽႃႈႁူမ်ႇၶူဝ်းၼွၼ်း လႄႈ
ၶိူင်ႈၸႂ်ႉတၢင်းတိုဝ်းၸဝ်ႈသၢင်ႇၶဝ်
မႆႈၵႂႃႇမူတ်း ၊ လိူဝ်သေၼၼ်ႉ
ပပ်ႉလိၵ်ႈလင်ႇၵႃႇမိူဝ်ႈၵွၼ်ႇ
၊ ပပ်ႉလိၵ်ႈပိတၵၢတ်ႈ တင်းၼမ် ၊ ဢိၵ်ႇပႃးတင်း
ႁုၼ်ႇႁၢင်ႈၽြႃးလူင် 2 သူႇ ၊
ၽြႃးၶႅၵ်းတွင်း 3 သူႇ ၵေႃႈလႆႈမႆႈၵႂႃႇ
ၼႆၶႃႈယဝ်ႈ ။
ဝတ်ႉၵျႂင်းၼႆႉ ၸဝ်ႈတႃႇၼ
တၵႃႇသတ်ႉထႃးၶဝ် ၵေႃႇသၢင်ႈလူႇတၢၼ်းဝႆႉ မိူဝ်ႈပူၼ်ႉမႃး သၢဝ်းပီပၢႆ ။ လွင်ႈလုသုမ်းၼႆႉ
ၶၢတ်ႈလၢမ်းဝႃႈ တင်းသဵင်ႈတေတၢၼ်ႇငိုၼ်းမၢၼ်ႈ သၢမ်ပၢၵ်ႇသႅၼ် ၊ သင်ဝႃႈ တေၶႂ်ႈ လူတၢၼ်းၸွႆႈထႅမ်ပၼ် ၽႃႈႁူမ်ႇၶူဝ်းၼွၼ်း ၶိူင်ႈၸႂ်ႉတိုဝ်း ၸဝ်ႈသၢင်ႇၶဝ်လႄႈသင် ၊ ၶႂ်ႈလူႇတၢၼ်း
တႃႇတေမူၼ်ႉမေးၵေႃႇသၢင်ႈၶိုၼ်း
ၵျႂင်းမႂ်ႇလႄႈသင်
ၵပ်းသိုပ်ႇမႃးလႆႈတီႈ
ၸဝ်ႈၶူး သုမၼ မၢႆၾူၼ်း 09 - 259041173
ၼႆၵေႃႈ လႆႈယူႇၼႆၶႃႈဢေႃႈ ။
ၶႅပ်းႁၢင်ႈ: Sai Lern
ၵေႃသိုဝ်ႇၶၢဝ်ႇၵူၼ်းမိူင်းတႆး
13/08/2017
