မီးၵူၼ်းၸူၼ်ၼိူဝ်တၢင်းၵႃး မိူင်းၼွင် - ၶူဝ်လမ် ၊ လုၵ်ႈႁဵၼ်းၸၢႆးၵေႃႉၼိုင်ႈ ၺႃးယိုဝ်းသေ လုတၢႆ

ၸုမ်းၶၢဝ်ႇငဝ်းႁၢင်ႈသဵင်တႆး 10/01/2018

ၼႂ်းၶၢဝ်ႇ DVB တႅမ်ႈမွၵ်ႇၵႂႃႇဝႃႈ  ဝၼ်းထိ 8 လိူၼ်ထူၼ်ႈ 1 ပီ 2018 ၼီႈ မိူဝ်ႈဝႃး ယၢမ်းႁူဝ်ၶမ်ႈ မီးၵူၼ်းၸူၼ်ဢွၵ်ႇမႃးၼိူဝ်တၢင်းၵႃး မိူင်းၼွင် - ၶူဝ်လမ် ဢၼ်မီးၽၢႆႇၸဵင်ႇၸၢၼ်းဝၼ်းဢွၵ်ႇ မိူင်းၼွင် ၸေႈဝဵင်းၵေးသီး မိူင်းတႆးပွတ်းၸၢၼ်း  ၊ သေယဝ်ႉၸူၼ်ဢဝ် ၵွင်ႈယိုဝ်းသႂ်ႇၵူၼ်းမိူင်းလႄႈ လုၵ်ႈႁဵၼ်းၸၢႆးေၵႃႉၼိုင်ႈ လႆႈလုတၢႆသေ ႁိမ်ဢဝ်ဢႅပ်ႇငိုၼ်း ႄလႈ ဢီႈယႃၵႂႃႇၸွမ်း ။

ၶႅပ်းႁၢင်ႈ ပၢႆႉတၢင်းၶဝ်ႈဝဵင်းၶူဝ်လမ်

လုင်းသီႇႁ ၵေႃႈပဵၼ် ပေႃႈလုၵ်ႈဢွၼ်ႇ ဢၼ်လုတၢႆၵႂႃႇၼၼ်ႉ လၢတ်ႈၼႄၽူႈသိုဝ်ႇၶၢဝ်ႇဝႃႈ မိူဝ်ႈဝႃးၼႆႉ ၶဝ်သၢမ်ၵေႃႉ ပေႃႈမႄႈလုၵ်ႈ လုၵ်ႉတင်းလႃႈသဵဝ်ႈသေ ဢၢင်ႈတေမိူဝ်းမိူင်းၼၢႆး ။ လုၵ်ႈၸၢႆးၶဝ်ၵေႃႉ ေႁႃႈၵႃးၶဝ်သေ မႃးၼိူဝ်သဵၼ်ႈတၢင်းၵႃး မိူင်းၼွင် - ၶူဝ်လမ် ။ ထိုင်မႃးတီႈၼိုင်ႈ မီးၵူၼ်း 3 ၵေႃႉ ယိပ်းၵွင်ႈယၢဝ်းသေ မႃးႁေႉၵႃးၶဝ် ။ လုၵ်ႈၸၢႆးၶဝ်ၵေႃႈ  ၵိုတ်းပၼ်ၵႃးသေ ႁပ်းၽၵ်းတူမၢၼ်ႇၵႃး ။ ယၢမ်းၼၼ် ၵေႃႉဢၼ်မီးၽၢႆႇၶႂႃႇလူတ်ႉသမ်ႉ ဢဝ်ၵွင်ႈယိုဝ်းသႂ်ႇႁူဝ်မၼ်းၸၢႆးလႄႈ လုၵ်ႈၸႆၢးလႆႈတၢႆ ထင်တီႈၵမ်းလဵဝ် ၼႆယဝ်ႈ ။

ဝၢႆးၼၼ်ႉယဝ်ႉ ၸူၼ်ၶဝ်ၼႆႉ ႁိမ်ဢဝ် မၢႆၾၢင်မၢတ်ႈပူင်ႇတိၼ်ႇ ၊ ဢႅပ်ႇၼင်ႇ ဢၼ်ပႃးငိုၼ်းၼႂ်းမၼ်း  8 သႅၼ်ပျႃး  ၊ ယႃႈယႃဢၼ်မေးၼၢင်းမၼ်းဢဝ်မႃးတႃႇၵိၼ်သေ ၶိုၼ်းၶဝ်ႈၵႂႃႇၼႂ်းထိူၼ်ႇလႄႈ လုင်းသီႇႁ ၵေႃႉ ဢဝ်တူဝ်တၢႆလုၵ်ႈၸၢႆး မႃးသူင်ႇဝႆႉတီႈႁူင်းယႃ ၶူဝ်လမ် ၼႆယဝ်ႈ ။

လုၵ်ႈဢွၼ်ႇၸၢႆး ဢၼ်လုတၢႆၵႂႃႇၼၼ်ႉ ၸိုဝ်ႈႁွင်ႉ ၸၢႆးယႄးထႅတ်ႉဢွင်ႇ တိုၵ်ႉႁဵၼ်းလိၵ်ႈ ၸၼ်ႉၵဝ်ႈ ယူႇတီႈ ႁုင်းႁဵၼ်းၸၼ်ႉသုင် ဝဵင်းမိူင်းၼၢႆး ။ ၵဵဝ်ႇလူၺ်ႈလွင်ႈၼႆႉသေ ၸၢႆးၵျေႃႇၸေႇယ တႅၼ်းၽွင်း ပႃႇတီႇႁူဝ်သိူဝ် လၢႆးၶႃႈ လၢတ်ႈၼႄၸုမ်း ငဝ်း ႁၢင်ႈ သဵင်တႆးဝႃႈ -  ၼႂ်းပွတ်းတွၼ်ႈၼၼ်ႉ ဢမ်ႇမီးၵူၼ်းႁၢႆႉၵူၼ်းၸူၼ် ႁိုင်ၼၢၼ်းၼႃႇယဝ်ႉ ။ ထႅင်ႈလွင်ႈၼိုင်ႈၵေႃႈ မၼ်းယူႇတႂ်ႈၼႃႈလိၼ် ၽွင်းငမ်း တပ်ႉတိူင်း ယလၶ- ၶူဝ်လမ် သေ ဢမ်ႇပေႃးၵႆႇ တင်းတပ်ႉၶဝ်ၵႃႈႁိုဝ်လႄႈ ဢမ်ႇထုၵ်ႇလီ ပဵၼ်သေဢိတ်း ။ မိူဝ်ႈလႆႈ ပဵၼ်ၵႂႃႇၸိူင်ႉၼႆၼႆႉ မိူၼ်ႁၢင်ႈ ဢမ်ႇမီးလွင်ႈႁူမ်ႇလူမ်ႈ တႃႇၵႂႃႇတႃႈပႆတၢင်း ၼႆယဝ်ႉ ။

ၼႂ်းၶၢဝ်ႇ DVB ႄတႉ တႅမ်ႈမွၵ်ႇထႅင်ႈဝႃႈ - ယၢမ်းလဵဝ်  ပလိၵ်ႈႁၢၼ် မိူင်းၼွင် ႄလႈတင်း တပ်ႉမၢၼ်ႈ ၶလယ 287 ၶဝ် ႁူမ်ႈၵၼ်သေ ၸွမ်းသွၵ်ႈႁႃၵူၼ်းၸူၼ် 3 ၵေႃႉၼၼ်ႉ  ၊ ၽၢႆႇႁွင်ႇ တီႈဢၼ်ၶဝ်ၸူၼ် ပိူၼ်ႈ ယၢၼ်ၵႆမွၵ်ႈ ၼိုင်ႈပၢၵ်ႇလႃ ၼၼ်ႉ ၶဝ်ႁၼ်မီးလူတ်ႉၶိူင်ႈလမ်းၼိုင်ႈ လူမ်ႉဝႆႉၼႂ်းႁွင်ႈၼိုင်ႈဢၼ် ၊ သေယဝ်ႉ တႃႇတေဢဝ်တၢင်းၽိတ်းၸူၼ်ၼၼ်ႉ ယင်းတိုၵ်ႉ သိုပ်ႇလမ်းႁႃတူဝ်ထႅင်ႈယူႇ ၼႆယဝ်ႈ ။