မၢဝ်ႇတႆး 3 ၵေႃႉ ၺႃးတိၺွပ်း ယွၼ်ႉလူလၢႆၵဝ်းယိင်းၼွၵ်ႈမိူင်း ဝႃႈၵၼ်ႉၸၼ်မၼ်းၼၢင်း

ၶၢဝ်ႇထႆး brighttv (ไบรท์ทีวี ) တႅမ်ႈမွၵ်ႇၵႂႃႇဝႃႈ ဝၼ်းထိ 27 လိူၼ်ထူၼ်ႈ 4 ပီ 2018 ၼီႈ မိူဝ်ႈၼႂ်ၸဝ်ႉၼႆႉ ႁႅင်းၵၢၼ်ၸၢႆးတႆး 3 ၵေႃႉ တီႈၸေႈဝဵင်းလွႆသၵဵတ်း ၸေႈတွၼ်ႈၵဵင်းမႆႇ ၺႃးၸဝ်ႈၼႃႈတီႈၶဝ်တိၺွပ်း ဢၼ်ဝႃႈလူၺ်ႈလွင်ႈတၢင်းၽိတ်း ႁူမ်ႈၵၼ်လူလၢႆၵၼ်ႉၸၼ် ၼၢင်းယိင်းၼွၵ်ႈမိူင်း ၸၢဝ်းဢမေႇရိၵၼ်ႇ ။

ၸဝ်ႈၼႃႈတီႈပလိၵ်ႈႁၢၼ် ၸေႈဝဵင်းလွႆသၵဵတ်းလၢတ်ႈၼႄၽူႈသိုဝ်ႇၶၢဝ်ႇၶဝ်ဝႃႈ  မိူဝ်ႈၶမ်ႈဝၼ်းထိ 26 လိူၼ်ထူၼ်ႈ 4 တီႈၼႂ်းဝၢၼ်ႈပႃႇသဝ်ႉ (ป้าเสร้า) ဢိူင်ႇသၼ်ပူႇလူၺ်း (สันปูเลย) ၸေႈဝဵင်းလွႆသၵဵတ်းၼၼ်ႉ ၼၢင်းယိင်းမိူင်းဢမေႇရိၵၼ်ႇၵေႃႉၼိုင်ႈ ၼင်ႈၵိၼ်လဝ်ႈၸွမ်းၵၼ် တင်းၵူၼ်းၸၢႆးတႆး 3 ၵေႃႉ ၊ ဝၢႆးၼၼ်ႉယဝ်ႉ မိူဝ်ႈမၼ်းၼၢင်း ၵႂႃႇဢွၵ်ႇၼွၵ်ႈလႄႇပၢင်ႇၼႂ်းသူၼ်ႁၢမ်း  ၸၢႆးတႆး 3 ၵေႃႉၼၼ်ႉသမ်ႉ ၵႂႃႇၸွမ်းလင်မၼ်းၼၢင်းသေ ၸၼ်ဢဝ်မၼ်းၼၢင်းၵႂႃႇလူလၢႆၵၼ်ႉၸၼ် တႂ်ႈတူၼ်ႈမၢၵ်ႇၵႅင်း၊ ၸုမၼ်းၼၢင်းဢၼ်ပဵၼ်ၸၢဝ်းလဵဝ်ၵၼ်သမ်ႉ ထၢင်ႇထိူမ်သေမႃးၶႆႈၸွမ်းၽၢႆႇလင် ၊ ပႃးမႃးတင်းၵူၼ်း ဢဝ်ၽၢႆႇႁူမ်ႇလူမ်ႈၶဝ်လႄႈ ၸၢႆးတႆး 3 ၵေႃႉ လႅၼ်ႈပၢႆႈပႅတ်ႈ ၊ လိုၼ်းသုတ်းတႄႉ တိၺွပ်းၶဝ်လႆႈ ၶိုၼ်းတင်း 3 ၵေႃႉ ၊ ၶဝ်တင်း 3 ေၵႃႉ ယွမ်းႁပ်ႉတၢင်းၽိတ်းသေ လႆႈႁဵတ်းၼႄၽၢင်ႁၢင်ႈၶိုၼ်း ။

ၸၢႆးတႆး 3 ၵေႃႉၼၼ်ႉၸိုင် ၸိုဝ်ႈႁွင်ႉဝႃႈ ၸၢႆးၼွႆႉ ( ဢႃႇယု 37 ပီ ) ၊ ၸၢႆးလမ် ( ဢႃႇယု 22 ပီ ) လႄႈ ၸၢႆးလႅင် ( ဢႃႇယု 22 ပီ ) ပဵၼ်ႁႅင်းၵၢၼ်ယၢၼ်မိူင်းၸၢဝ်းတႆး မိူင်းမျၼ်ႇမႃႇ ၊ ၼၢင်းယိင်း ၵေႃႉဢၼ်ၺႃးၶဝ်ၵၼ်ႉၸၼ်ဢၼ်ဝႃႈၼၼ်ႉသမ်ႉ  ပဵၼ်ၵူၼ်းမိူင်းဢမေႇရိၵၼ်ႇ ဢႃႇယု လႆႈ 25 ပီ ။ ၸိူဝ်းၶဝ်ဢၼ်ၺႃးၺွပ်းၼၼ်ႉ လၢတ်ႈၼႄၸဝ်ႈၼႃႈတီႈၶဝ်ဝႃႈ ၶမ်ႈဝႃးၼႆႉ ၶဝ်တိုၵ်ႉၼင်ႈၵိၼ်လဝ်ႈ ယူႇၼႂ်းလၢၼ်ႉ ၶၢႆတၢင်းၶၢႆဢၼ်ၼိုင်ႈ ၊ သမ်ႉမီးၵူၼ်းတၢင်ႇမိူင်းယိင်းၸၢႆးၵူႈၼိုင်ႈ မႃးၼင်ႈၵိၼ် ပီႇယႃႇ ၊ ၶဝ်လႆႈယဝ်ႉယွၵ်ႇမိုတ်ႈၵိုဝ်းၵၼ်သေ ၶၢႆႉမႃးၵိၼ်လဝ်ႈဝူင်းလဵဝ်ၵၼ် ၊ ၵိၼ်ၵႂႃႇၵိၼ်မႃး ဢွၼ်ၵၼ်မဝ်းလဝ်ႈ တင်းယိင်းတင်းၸၢႆး၊ ၼၢင်းယိင်းၼၼ်ႉ မိူၼ်ၶႂ်ႈပၢၼ်းၶဝ်သေ သမ်ႉၼုင်ႈၵူၼ်ပွတ်းဝႆႉလႄႈ လႆႈလုပ်ႈလၢမ်းလဵၼ်ႈတူဝ်မၼ်းၼၢင်း ၊ ၸုမၼ်းၼၢင်းၼၼ်ႉၵေႃႈ မိူၼ်ဢမ်ႇၶႅၼ်သင်၊ မိူဝ်ႈမၼ်းၼၢင်းဢွၵ်ႇၵႂႃႇတင်းၼွၵ်ႈ ၶဝ်ၸင်ႇၸွမ်းၵႂႃႇၽၢႆႇလင်သေ ၵႂႃႇမီးလွင်ႈႁူမ်ႈၵႃႇမတႂ်ႈတူၼ်ႈမၢၵ်ႇၵႅင်း ၊ ၶဝ်တင်းသၢမ်ၵေႃႉ လႆႈၵျေႃႇၸွမ်းမၼ်းၼၢင်းယဝ်ႉ သမ်ႉမီးၵူၼ်းမႃးႁၼ်၊ သမ်ႉဢဝ်ၾႆးထၢတ်ႈသွင်ႇသႂ်ႇလႄႈ မၼ်းၼၢင်းၵေႃႈႁွင်ႉသႅၼ်ႇၵမ်းလဵဝ် ၊ ၶဝ်ၵေႃႈၼႅၻ်ႈလႅၼ်ႈပၢႆႈၵေႃႉတီႈၵေႃႉတၢင်း ၊  ၵူၺ်းၵႃႈ ပိူၼ်ႈတိလႆႈၸၢႆးၼွႆႉဢွၼ်တၢင်းသေ ၸၢႆးလမ်တင်းၸၢႆးလႅင်တႄႉ ၺႃးတိၺွပ်းၽွင်းၶဝ်တိုၵ်ႉမိူဝ်းၶိုၼ်းဢွင်ႈႁိူၼ်းၶဝ် ၼႆယဝ်ႈ ။ တင်းသၢမ်ၵေႃႉပၢၵ်ႈထဵင်ဝႃႈ ၶဝ်ဢမ်ႇလႆႈလူလၢႆၵၼ်ႉမၼ်းၼၢင်း ၊ ၸိူဝ်းလႆႈပဵၼ်ၵႂႃႇၼၼ်ႉ ယွၼ်ႉပိူဝ်ႈမၼ်းၼၢင်းၽွမ်ႉၸႂ်ၸွမ်းၵူၺ်း ၼႆယဝ်ႈ ။

ၵဵဝ်ႇလူၺ်ႈလွင်ႈၼႆႉသေ พล.ต.ต.ศรายุทธ สงวนโภคัย ၽူႈၵွၼ်းလုမ်းပလိၵ်ႈႁၢၼ် ၸေႈတွၼ်ႈၵဵင်းမႆႇ လၢတ်ႈၼႄၽူႈသိုဝ်ႇၶၢဝ်ႇဝႃႈ  မိူဝ်ႈၶဝ်ၸႅတ်ႈထၢမ်သပ်းသေးဢမုၶတီးၼႆႉ ၸဝ်ႈၼႃႈတီႈ လုမ်းၽွင်းတၢင်မိူင်း ဢမေႇရိၵၼ်ႇၶဝ်ၵေႃႈမႃးထွမ်ႇၸွမ်း ၊  ၵူၼ်းႁဵတ်းၽိတ်းၼၼ်ႉ ၶဝ်ၶႂ်ႈတွပ်ႇၸိူင်ႉႁိုဝ်ၵေႃႈတွပ်ႇလႆႈ ၊ မၼ်းပဵၼ်သုၼ်ႇလႆႈၶဝ် ၊ ၵူၺ်းၵႃႈ ၽၢႆႇပလိၵ်ႈႁၢၼ်တမ်ႇလူတ်ႇတႄႉ လႆႈဢဝ်တၢင်းၽိတ်းတေႃႇ ၶဝ် 3 ၵေႃႉ ဢၼ်ဝႃႈလူၺ်ႈလွင်ႈ ႁူမ်ႈၵၼ်လူလၢႆၵၼ်ႉၸၼ်ၼၢင်းယိင်းသေယဝ်ႉ တေသပ်းသေးထတ်းထွင်ၶိုၼ်း သၢၵ်ႈသေႇလၵ်းထၢၼ်ၵူႈဢၼ်သေ တေပၼ်တၢမ်ႇတၢင်းၽိတ်းၵႂႃႇ ၊

မိူဝ်းၼႃႈဝၢႆးလင် ၼင်ႇႁိုဝ်တေဢမ်ႇမီးလွင်ႈၵၢၼ်ၽိတ်းမၢႆမီႈၸိူင်ႉၼႆထႅင်ႈၼႆႉ လႆႈမီးၶေႃႈၸိသင်ႇထိုင် ႁူင်းပလိၵ်ႈႁၢၼ်ၵူႈတီႈတီႈ ႁႂ်ႈဢွၼ်ၵၼ် ပႂ်ႉတူၺ်းႁႅင်းၵၢၼ်ယၢၼ်မိူင်းၶဝ်လီလီ ၼႆယဝ်ႈ  ။

ေၵႃသုိဝ်ႇၶၢဝ်ႇၵူၼ်းမူိင်းတႆး

28/04/2018