ၵူၼ်းမိူင်းမၢၼ်ႈ 36 ၵေႃႉ ၺႃးၼၢႆးၼႃႈမႃးပွႆႇပႅတ်ႈသေပၢႆဢမ်ႇၵႃး သမ်ႉပၢႆၺႃးပလိၵ်ႈ ထႆးတိၺွပ်းထႅင်ႈ
ၶၢဝ်ႇထႆႊရတ်ႉthairathတႅမ်ႈမွၵ်ႇၵႂႃႇဝႃႈ ၵူၼ်းမိူင်းမၢၼ်ႈ 36 ၵေႃႉ ၺႃးၼၢႆးၼႃႈပွႆးၸႃးၵူၼ်းၵၢင်
မႃးပွႆႇဝႆႉၼႂ်းသူၼ်ယၢင်တၢင် ၼႂ်းၸေႈတွၼ်ႈ ၽတ်ႉထလုင်းพัทลุงမိူင်းထႆးပွတ်းၸၢၼ်း ၊ ပၼ်ဢိုပ်းၶဝ်ႈဝႆႉသေ ပၢႆဢမ်ႇၵႃး သမ်ႉၺႃးၸဝ်ႈၼႃႈတီႈပလိၵ်ႈႁၢၼ်မိူင်းထႆးၶဝ်
တိၺွပ်းထႅင်ႈ ။
မိူဝ်ႈၸဝ်ႈၼႃႈတီႈၶဝ် ႁႂ်ႈၵူၼ်းပိၼ်ႇၽႃႇသႃႇ တွင်ႈထၢမ်တူၺ်းၸိုင် လႆႈႁုဝႃႈ ၸိူဝ်းၶဝ် လႆႈၶဝ်ႈ မႃးၼႂ်းမိူင်းထႆး ၽၢႆႇၸေႈတွၼ်ႈရၼွင်းမိူဝ်ႈဝၼ်းထိ 27 ၊ ဢၢင်ႈဢၢၼ်းပူၼ်ႉၵႂႃႇ ႁဵတ်းၵၢၼ်တီႈမိူင်းမလေးသျႃး ၊ လႆႈပၼ်ၵႃႈပွႆးၸႃးၼၢႆးၼႃႈၵူၼ်းၵၢင် ၼိုင်ႈၵေႃႉလႂ် မႅၼ်ႈငိုၼ်းထႆး 2 မိုၼ်ႇဝၢတ်ႇ ၊ ၼၢႆးၼႃႈၶဝ် ဢဝ်လူတ်ႉ 3 လမ်းသေ ၵႂႃႇႁပ်ႉၶဝ်မႃး ၊ မိူဝ်ႈမႃးထိုင်ၸွမ်းတၢင်းတီႈၼိုင်ႈ ၸဝ်ႈၵႃးလၢတ်ႈဝႃႈ တင်းၼႃႈမီးၸဝ်ႈၼႃႈတီႈထႆးၶဝ်တင်ႈရၢၼ်ႇပႂ်ႉသပ်းသေးလႄႈ ၵူဝ်ၺႃးတိၺွပ်း ၼႆသေ ႁေႃႈၶဝ်ႈမႃးၼႂ်းတၢင်းလတ်းထိူၼ်ႇ ၊ သမ်ႉမႃးပွႆႇၶဝ်ဝႆႉၼႂ်းသူၼ်ယၢင် တေႃႇထိုင်ဝၼ်းထိ 29 ၼႆႉ ယင်းပႆႇလႆႈၵိၼ်သင် ၼႆယဝ်ႈ ။
ဝၢႆးၼၼ်ႉယဝ်ႉ ၸဝ်ႈၼႃႈတီႈ သူင်ႇၶဝ်ၵႂႃႇတီႈ ၸုမ်းၽၢႆႇတူၺ်းလွမ်ႇပူၵ်းပွင်တူင်ႇဝူင်းၵူၼ်း ၸေႈတွၼ်ႈၽတ်ႉထလုင်းသေတေသပ်းသေးထႅင်ႈဝႃႈ ၸိူဝ်းၶဝ်ၼၼ်ႉ ၸွင်ႇၵဵဝ်ႇၸွမ်းလွင်ႈ ၵႃႉၶၢႆၵူၼ်း ႁိုဝ်ႇဢမ်ႇၵဵဝ်ႇ ၊ ၽၢႆႇၼိုင်ႈၵေႃႈ တေသွပ်ႇသွၵ်ႈသေႃႉႁႃ ၼၢႆးၼႃႈပွႆးၸႃးသေ ပၼ်တၢမ်ႇတၢင်းၽိတ်းၸွမ်းၼင်ႇမၢႆႇမီႈပၵ်းပိူင်မီးဝႆႉ ။ ၼႂ်းပိုၼ်ႉတီႈၶဝ်ၼၼ်ႉ ယွၼ်ႉမၼ်း မီးၸမ်မိူင်းမလေးသျႃးလႄႈ ၵႆႉလႆႈတိၺွပ်း ၵူၼ်းလၵ်ႉၶဝ်ႈမိူင်းၼႃႇ ။ ဢၼ်ၼၢႆးၼႃႈၶဝ် မႃးပွႆႇဝႆႉ ၵူၼ်းမိူင်းမၢၼ်ႈလၵ်ႉၶဝ်ႈမိူင်းၼႆႉ ပေႃးပႃးပွၵ်ႈၼႆႉၸိုင် ပဵၼ်ပွၵ်ႈၵမ်းထိ 3 ယဝ်ႉလႄႈ မိူဝ်းၼႃႈ တေလႆႈပၵ်းတႃပႂ်ႉတူၺ်းလီလီ ၼႆၶႃႈယဝ်ႈ ။
ၵေႃသိုဝ်ႇၶၢဝ်ႇၵူၼ်းမိူင်းတႆး 30/5/2018
