ၵူၼ်းၼုမ်ႇတႆးပေႃႉႁႅမ်ၵၼ်ၼႂ်းၵၢတ်ႇ တီႈၵဵင်းမႆႇ ဝၢတ်ႇၸဵပ်း 4 ၵေႃႉ
ဝၼ်းထိ 29 လိူၼ်ထူၼ်ႈ 9 ပီ 2018 ၼီႈ ၶၢဝ်းယၢမ်းမွၵ်ႈ 11 မူင်း တီႈၼႂ်းၵၢတ်ႇမိူင်းမႂ်ႇ ၵၢင်ဝဵင်းၵဵင်းမႆႇၼၼ်ႉ ၵူၼ်းၼုမ်ႇတႆး ၽိတ်းမေႃးပေႃႉႁႅမ်ၵၼ် လႆႈတိူဝ်ႉဝၢတ်ႇၸဵပ်း 4 ၵေႃႉ။
မၼ်းၸၢႆးသိုပ်ႇလၢတ်ႈထႅင်ႈဝႃႈ ၵဵဝ်ႇလူၺ်ႈလွင်ႈတၢင်း ဢၼ်ၶဝ်လႆႈၽိတ်းၵၼ်ၼၼ်ႉ ယွၼ်ႉသင်တေႉတေႉၼႆ ပႆႇႁူႉတႅတ်ႈတေႃးသေတႃႉ ၸွမ်းၼင်ႇဢၼ် ၸၢႆးၵျေႃႇလႅင်း ဢၼ်ၺႃးပေႃႉႁႅမ် ၶိုၼ်းၶႆႈၼႄတႄႉလၢတ်ႈဝႃႈ ဢမ်ႇလႆႈမီးပျသၼႃႇလိူင်ႈလၢဝ်းသင်ၵၼ် တင်းၸုမ်းၶဝ်တေႉတေႉ မိူဝ်ႈဝူင်ႈပူၼ်ႉမႃး ယၢမ်ႈၺႃးၵူၼ်းၼႂ်းၸုမ်းၶဝ် ၼိူဝ်လူတ်ႉၽူင်ႉ ၊ လၢတ်ႈဝႃႈ ယၵ်ႉတူၺ်းၼႃႈ ၶဝ်ႁဵတ်းသင်ၼႆသေ ပၢၼ်းၽိတ်းၶဝ်ၵူၺ်း ၊ တႃႇပွၵ်ႈၼိုင်ႈသမ်ႉ ၵိၼ်လၢဝ်ႈမဝ်းႁေမႃးၽိတ်း ၊ ပွၵ်ႈၼႆႉၵေႃႈ ဢမ်ႇမီးလွင်ႈတၢင်းယႂ်ႇလူင်သင် ၽွင်းမိူဝ်ႈဝၢၼ်ႈမိူင်းႁဝ်း ဢမ်ႇၵတ်းယဵၼ်လႄႈ လႆႈပၢႆႈမႃးယူႇမိူင်းပိူၼ်ႈ ၊ သမ်ႉမႃးၽိတ်းမေႃး ပေႃႉႁႅမ်ၵၼ်ၸိူင်ႉၼႆ ႁဵတ်းႁႂ်ႈၸိုဝ်ႈသဵင် ပီႈၼွင်ႉႁႅင်းၵၢၼ်တႆး လႆႈလုၸွမ်း ၼႆယဝ်ႈ ။
ၼႂ်းလိူၼ်ထူၼ်ႈၵဝ်ႈၼႆႉၵူၺ်းၼင်ႇၵဝ်ႇ ပူၼ်ႉမႃး မိူဝ်ႈဝၼ်းထိ 19 ၼၼ်ႉ တီႈဝၢၼ်ႈဝဵင်းယွင်း ၸေႈတွၼ်ႈလမ်းပုၼ်း မီးၵူၼ်းၼုမ်ႇႁႅင်းၵၢၼ်တႆးၼင်ႇၵၼ် ၵိၼ်လဝ်ႈမဝ်းသေ ၽိတ်းမေႃးၵၼ် ၊ ၵေႃႉဢၼ်မီးၸိုဝ်ႈဝႃႈ ၸၢႆးသႅင် ဢႃႇယု 16 ပီ ၺႃးပိူၼ်ႈဢဝ်မိတ်ႈပၢတ်ႇၶေႃးသေ လုတၢႆၵႂႃႇ ၊ ၸဝ်ႈၼႃႈတီႈပလိၵ်ႈႁၢၼ်လမ်းပုၼ်းၶဝ်တႄႉဝႃႈ ၵေႃႉဢၼ်ၶႃႈတၢႆမၼ်းၸၢႆးၼၼ်ႉ ၸိုဝ်ႈႁွင်ႉ ၸၢႆးယူင်း ပဵၼ်ၵူၼ်းၼုမ်ႇတႆးၼႂ်းၸုမ်းမူဝ်လမ် ၊ ၸုမ်းၶဝ်ယၢမ်ႈမီးဢမုတၢင်းၽိတ်း ဢၼ်ၵႆႉ လမ်းၽၼ်းပိူၼ်ႈ ယၢမ်းလဵဝ်တိုၵ်ႉလမ်းသွၵ်ႈႁႃတူဝ် ၸၢႆးယူင်းယူႇ ၼႆယဝ်ႈ ။
Photo: ชมรมคนกู้ภัยจังหวัดเชียงใหม่
ၵေႃသိုဝ်ႇၶၢဝ်ႇၵူၼ်းမိူင်းတႆး
30/09/2018
ไม่มีความคิดเห็น