လူတ်ႉတူႈႁပ်ႉတၢင်ႇႁႅင်းၵၢၼ်ယၢၼ်မိူင်း မိူင်းႁူမ်ႈတုမ်မၢၼ်ႈ ၽႃႇၺႃးတူၼ်ႈမႆႉ ၾႆးလုၵ်ႈမႆႈသေတၢႆတင်းၼမ်

မိူဝ်ႈၼႆႉဝၼ်းထိ 21 လိူၼ်ဢွၵ်ႇတူဝ်ႇပိူဝ်ႇ 2018 ၶၢဝ်းယၢမ်းၵၢင်ၼႂ် 6:50 ၼၼ်ႉ မီးႁႅင်းၵၢၼ်ယၢၼ်မိူင်း ၶီႇလူတ်ႉတီႈဝဵင်းၵုင်းထႅပ်ႈ (မိူင်းၵွၵ်ႇ) ဢွၵ်ႇၶၢဝ်းတင်းမိူဝ်းတင်းဝဵင်းမႄႈသွတ်ႇ ဢမ်ႇထင်ႇသေ လူတ်ႉလႆႈၵႂႃႇၽႃႇၺႃးတူၼ်ႈမႆႉ ဢၼ်မီးႁိမ်းၶၢင်ႈသဵၼ်ႈတၢင်းၽႁူၼ်ယူဝ်းထိၼ်း ၸေႈတွၼ်ႈၵမ်းၽႅင်းၽဵတ်း ႁဵတ်းႁႂ်ႈႁႅင်းၵၢၼ်ယၢၼ်မိူင်းလႄႈ ၵူၼ်းႁေႃႈလူတ်ႉၸိူဝ်းၶီႇမႃးၼိူဝ်လူတ်ႉၼၼ်ႉ လႆႈတၢႆထိုင်တီႈၵႂႃႇ 9 ၵေႃႉသေ လႆႈႁပ်ႉတင်းမၢတ်ႇၸဵပ်း 7 ၵေႃႉ ၸုမ်းၸွႆႈလိူဝ်ၵၢၼ်ထူပ်းၽေးၵိုင်ႉၵၢင်ႉၶဝ် လႆႈဢဝ်ၵႂႃႇသူင်ႇယူတ်းယႃတူဝ် တီႈႁူင်းယႃၵမ်းၽႅင်းၽဵတ်းသေ ၼႂ်းၵူၼ်းမၢတ်ႇၸဵပ်း 7 ၵေႃႉၼၼ်ႉ ၽွင်းၶၢဝ်းတိုၵ်ႉယူတ်းယႃတူဝ်ယူႇ သမ်ႉလႆႈတၢႆၵႂႃႇထႅင်ႈ 2 ၵေႃႉၼႆယဝ်ႉ လူတ်ႉဢၼ်ၵိူတ်ႇၽေးၵိူင်ႉၵၢင်ႉၼႆႉ ပဵၼ်လူတ်ႉတူႈ TOYOTA တူဝ်ႇယူဝ်ႇတႃႉသီၶၢဝ် မၢႆလူတ်ႉ 33-2779 ၵုင်းထဵပ်ႈမႁႃႇၼၶွၼ်ႇၼႆယဝ်ႉ။

ဢိင်းၼိူဝ်လႆႈပဵၼ်ၽေးၵိုင်ႉၵၢင်ႉၼႆသေ ယၢမ်းလဵဝ်ၸဝ်ႈၼႃႈတီႈထႆး ႁူင်းပလိၵ်ႈၸေႈတွၼ်ႈၵမ်းၽႅင်းၽဵတ်း ၶဝ် ၶၢတ်ႈလၢမ်းဝႆႉ 2 ၶေႃႈ ၶေႃႈ 1 ၼႆႉယွၼ်ႉၽူၼ်တူၵ်းႁႅင်းလႄႈသဵၼ်ႈတႃႈသၢႆတၢင်းမိုၼ်ႈသေ လႆႈၽႃႇၺႃးတူၼ်ႈမႆႉ ၶေႃႈထိ 2 ယွၼ်ႉၵူၼ်းႁေႃႈလူတ်ႉၼွၼ်းလပ်းလႄႈ လူတ်ႉၸင်ႇလႆႈၽႃႇၺႃးတူၼ်ႈမႆႉၼႆယဝ်ႉ။

လူတ်ႉႁပ်ႉၸၢင်ႈတၢင်ႇႁႅင်းၵၢၼ်ယၢၼ်မိူင်းၼႆႉ လႆႈႁပ်ႉဢဝ်ႁႅင်းၵၢၼ်တီႈမႁႃႇၶျႆး တီႈၸေႈတွၼ်ႈမႁႃႇၶျႆး မုင်ႈၼႃႈဢွၵ်ႇၶၢဝ်းတၢင်းမႃးတင်း ၸေႈဝဵင်းမႄႈသွတ်ႇ ၸေႈတွၼ်ႈတၢၵ်ႇသေ ၽွင်းတိုၵ်ႉၶီႇလူတ်ႉ မႃးၽႅဝ်ပွတ်းတၢင်းၼၼ်ႉ သဵၼ်ႈတၢင်းမိုၼ်ႈၼႃႇလႄႈ လူတ်ႉၵေႃႈလႆႈၵႂႃႇၽႃႇၺႃးတူၼ်ႈမႆႉ ဢၼ်မီးႁိမ်းၶၢင်ႈသဵၼ်ႈတၢင်းၽႁူၼ်ယူဝ်းထိၼ်းယဝ်ႉ လူတ်ႉလႆႈထုၵ်ႇၾႆးမႆႈၵႂႃႇသေ ထိုင်တီႈႁႅင်းၵၢၼ်လႄႈႁူမ်ႈပႃးၵူၼ်းႁေႃႈလူတ်ႉ လႆႈတၢႆထင်တီႈၵႂႃႇ 9 ၵေႃႉ လႆႈၵႂႃႇတၢႆတီႈႁူင်းယႃထႅင်ႈ 2 ၵေႃႉသေ ၸိူဝ်းတိုၵ်ႉမၢတ်ႇၸဵပ်းထႅင်ႈ 5 ၵေႃႉမီးယူႇတီႈႁူင်းယႃၵမ်းၽႅင်းၽဵတ်းၼႆယဝ်ႉ။