ႁႅင်းၵၢၼ်ၵေႃႉၼိုင်ႈ ၺႃးတိၺွပ်း ယွၼ်ႉဢဝ်ႁၢင်ႈပိူဝ်ႉပူၺ် သႂ်ႇဝႆႉၼႂ်းၾူၼ်းမိုဝ်းထိုဝ်

ၶၢဝ်ႇ chiangmainews တႅမ်ႈမွၵ်ႇၵႂႃႇဝႃႈ တီႈၸေႈဝဵင်းႁၢင်တူင်း ၸေႈတွၼ်ႈၵဵင်းမႆႇ မိူင်းထႆးၼၼ်ႉ မီးႁႅင်းၵၢၼ်ယၢၼ်မိူင်း ဢၼ်ပဵၼ်ၵူၼ်းမိူင်းမၢၼ်ႈၵေႃႉၼိုင်ႈ ၺႃးၸဝ်ႈၼႃႈတီႈၶဝ်တိၺွပ်း ယွၼ်ႉလႆႈႁၼ် ၶႅပ်းႁၢင်ႈလႄႈ ဝီႊတီႊဢူဝ်ႊ ဢၼ်ပႃးႁၢင်ႈပိူဝ်ႉႁၢင်ႈပွႆႇပူၺ် မီးယူႇၼႂ်းၾူၼ်းမိုဝ်းထိုဝ်မၼ်းၸၢႆး ။

พ.ต.อ.ฉัตรมงคล วศินอมร ၸဝ်ႈၼႃႈတီႈ လုမ်းပလိၵ်ႈႁၢၼ် ၸေႈတွၼ်ႈ မၢႆ 5 လၢတ်ႈၼႄၽူႈသိုဝ်ႇၶၢဝ်ႇဝႃႈ ၼႂ်းမိူင်းထႆးၼႆႉ မီးဝႆႉပၵ်းပိူင်မၢႆမီႈဢၼ်ႁေႉႁၢမ်ႈလွင်ႈ ၵဵပ်းသိမ်းပိုၼ်ၽႄ ၶႅပ်းႁၢင်ႈလႄႈဝီႊတီႊဢူဝ်ႊ ဢၼ်ပႃး ႁၢင်ႈပိူဝ်ႉႁၢင်ႈပူၺ် ပူၼ်ႉပႅၼ်လွင်ႈသုၼ်ႇလႆႈၵႃႇမလုၵ်ႈဢွၼ်ႇ ဢႃႇယု ꨼18 ၶူပ်ႇလူင်းတႂ်ႈေသ ဢဝ်ႁဵတ်း ပဵၼ်ၽွၼ်းလီသုၼ်ႇတူဝ်။

ၵွပ်ႈၼၼ်ႄလႈ မီးဝႆႉမုၵ်ႉၸုမ်း ၽၢႆႇႁေႉၵင်ႈသုၼ်ႇလႆႈသုၼ်ႇပဵၼ် လွင်ႈပူၼ်ႉပႅၼ်လူလၢႆၵႃႇမလုၵ်ႈဢွၼ်ႇ ဢၼ်မီးၸိုဝ်ႈဝႃႈ Thailand Internet Crimes Against Childern ( TICAC ) ဢၼ်ဝႃႈၼၼ်ႉ ၸုမ်းၶဝ်ၼႆႉ လႆႈၸႂ်ႉတိုဝ်း ၶိူင်ႈမိုဝ်းၶိုတ်းၵၢပ်ႈပၢၼ်မႂ်ႇ ဢၼ်ႁွင်ႉဝႃႈ Cellebrite ၼႆၼၼ်ႉသေ ၵူတ်ႇၸႅတ်ႈသေႃႉႁႃ File-ၾၢႆႇလ်ဢၼ်ပူၼ်ႉပႅၼ်သုၼ်ႇလႆႈၵႃႇမလုၵ်ႈဢွၼ်ႇေသယဝ်ႉ လႆႈႁူပ်ႉႁၼ် ၼႂ်းၾူၼ်းမိုဝ်းထိုဝ်ဢၼ်ၼိုင်ႈ ပဵၼ်မိၵ်ႈၸုမ်ႈ VIVO သႅၼ်းႁုၼ်ႈ 1724 မီးဝႆႉႁၢင်ႈပိူဝ်ႉႁၢင်ႈပူၺ်လုၵ်ႈဢွၼ်ႇ ဢၼ်ႁဵတ်းလွင်ႈဢမ်ႇလီဢမ်ႇလၵ်းႄလႈ ၸင်ႇလႆႈယွၼ်းၶႂၢင်ႉမၢႆတိၺွပ်းတီႈလုမ်းတြႃးၸေႈတွၼ်ႈၵဵင်းမႆႇသေ ၵႂႃႇၶူၼ်ႉႁႃတိၺွပ်း ၽူႈပဵၼ်ၸဝ်ႈၶွင်ၾူၼ်းမိုဝ်းထိုဝ် လုၵ်ႈၼၼ်ႉ ။

ထိုင်မႃးဝၼ်းထိ ꨼13 လိူၼ်ထူၼ်ႈ 11 ပီ 2018 ၼီႈ မိူဝ်ႈဝႃးၼႆႉ လႆႈၵႂႃႇသွၵ်ႈႁၼ်ၸဝ်ႈၶွင်ၾူၼ်း တီႈၼႂ်းမူႇဝၢၼ်ႈ หารแก้ว ၸေႈဝဵင်း หางดง ၸေႈတွၼ်ႈ ၵဵင်းမႆႇ မၼ်းၸၢႆးၸိုဝ်ႈႁွင်ႉဝႃႈ ၸၢႆးယုမ်ႉၶိူဝ်း ဢႃႇယု 21 ပီ ပဵၼ်ႁႅင်းၵၢၼ်ယၢၼ်မိူင်း - မိူင်းမျၼ်ႇမႃႇ မႃးႁဵတ်းၵၢၼ်ပႂ်ႉယၢမ်း ၼႂ်းမူႇဝၢၼ်ႈၼၼ်ႉ မိူဝ်ႈၸဝ်ႈၼႃႈတီႈၶဝ် ၶူၼ်ႉႁႃၼႂ်းၾူၼ်းမၼ်း လႆႈႁၼ်ၶႅပ်းႁၢင်ႈလႄႈ ဝီႊတီႊဢူဝ်ႊ ဢၼ်ပိူဝ်ႉဢၼ်ပွႆႇပူၺ်ႇတင်းၼမ် မၼ်းၸၢႆးတွပ်ႇလၢတ်ႈဝႃႈ ႁၢင်ႈၸိူဝ်းၼၼ်ႉ လႆႈ download ဢဝ်မႃးတီႈ ဢႅပ်ႉ LINE ဢဝ်မႃးတူၺ်းလဵၼ်ႈ ပုၼ်ႈတႃႇမူၼ်ႈၸႂ်ပေႇၸႂ်ၸဝ်ႈၵဝ်ႇၵူၺ်း ဢမ်ႇယၢမ်ႈႁူႉမႃးဝႃႈ မၼ်းၽိတ်းမၢႆမီႈပၵ်းပိူင်ၼႆယဝ်ႈ ပဵၼ်ႁိုဝ်ၵေႃႈယႃႇ ၸဝ်ႈၼႃႈတီႈၶဝ်တႄႉ လႆႈသိမ်းဢဝ်ၾူၼ်းမိုဝ်းထိုဝ် ႄလႈ Sim Card မၼ်းၸၢႆးသွင်ဢၼ် ပၢႆတိၺွပ်းဢဝ်တူဝ်မၼ်းၸၢႆးၵႂႃႇသေ တေပၼ်တၢမ်ႇတၢင်းၽိတ်းၵႂႃႇၼႆယဝ်ႈ ။

ၸွမ်းၼင်ႇ ပၵ်းပိူင်မၢႆမီႈၶွမ်ႇပိဝ်ႇတိူဝ်ႇမိူင်းထႆးမၵ်းမၼ်ႈဝႆႉ မိူဝ်ႈပီ 2015 ၼီႈ မၢႆမီႈ 1 / 17 ( 1 မၢႆၸိူၼ်း 17 ) ၼၼ်ႉဝႃႈၸိုင် ၽူႈလႂ်ၽႂ်သေမဝ်ႇဝႃႈ ပေႃးၵဵပ်းသိမ်း ဢမ်ႇၼၼ် သိုပ်ႇပိုၼ်ၽႄႈ ၶႅပ်းႁၢင်ႈ ဢမ်ႇၼၼ် ဝီႇတီႇဢူဝ်ႇ ဢၼ်ပဵၼ်ႁၢင်ႈပိူဝ်ႉ ႁၢင်ႈပွႆႇပူၺ် ၼႂ်းတၢင်းတီႈဢမ်ႇလီ ၊ သူၼ်းၸႂ်လွင်ႈၵႃႇမ ဢဝ်ပဵၼ်ၼမ်ႉတွၼ်းၽွၼ်းလီ တႃႇတူဝ်ၵဝ်ႇၼႆၸိုင် ၸၢင်ႈၺႃးတၢမ်ႇတူၵ်းၶွၵ်ႈ ဢမ်ႇပူၼ်ႉ 5 ပီ ဢမ်ႇၼၼ် တၢမ်ႇငိုၼ်း ဢမ်ႇပူၼ်ႉ 1 သႅၼ်ဝၢတ်ႇ ၼႆယဝ်ႈ ။

ယိၼ်းၸူမ်းၸဝ်ႈၶွင်ၶႅပ်းႁၢင်ႈ

ၵေႃသိုဝ်ႇၶၢဝ်ႇၵူၼ်းမိူင်းတႆး

14/11/2018