ပီႈၼွင်ႉၸၢဝ်းလွႆ ႁႃႈပၢၵ်ႇပၢႆ ၵူဝ်သိုၵ်းတႆးယိုဝ်းၵၼ်လႄႈ သွင်ႉပၢႆႈႁႃဝတ်ႉ

ဝၼ်းထိ 20 လိူၼ်ထူၼ်ႈ 2 ပီ 2019 ၼီႈ မိူဝ်ႈၼႆႉ ယၢမ်းၵၢင်ၼႂ် ယွၼ်ႉၵူဝ်သိုၵ်းတႆး 2 ၽၢႆႇ ပဵၼ်ပၢင်တိုၵ်းယိုဝ်းသႂ်ႇၵၼ်ႄလႈ ပီႈၼွင်ႉၸၢဝ်းလွႆ ဝၢၼ်ႈပႃႇၵၢင်း ဢိူင်ႇပၢင်ႁုင်း ၸေႈဝဵင်းသီႇပေႃႉၶဝ် ဢၢၼ်ႇႁူဝ်ပၢၵ်ႇ ဢွၼ်ၵၼ်ပၢႆႈယၢၼ်ႁိူၼ်းယေး မႃးသေႃႉႁူမ်ႈတီႈ ဝၢၼ်ႈလီႈ ၸေႈဝဵင်းသီႇပေႃႉ ။

လုင်းၸၢႆးၼွင်ႉ ၽူႈၵွၼ်းဢိူင်ႇ ဝၢၼ်ႈလီႈ ၸေႈဝဵင်းသီႇပေႃႉ လၢတ်ႈၼႄၸုမ်းငဝ်းႁၢင်ႈသဵင်တႆးဝႃႈ မိူဝ်ႈၼႆႉ ၵၢင်ၼႂ်ၸဝ်ႉ ပီႈၼွင်ႉၸၢဝ်းလွႆ ဢၼ်ယူႇဝၢၼ်ႈပႃႇၵၢင်း ဢိူင်ႇပၢင်ႁုင်း ၸေႈဝဵင်းသီႇပေႃႉၶဝ် ဢွၼ်ၵၼ်ပၢႆႈမႃးတီႈ ဝတ်ႉၵျႂင်းဝၢၼ်ႈလီႈ ဢၼ်ယၢၼ်ၵႆၵၼ်တင်းဝၢၼ်ႈၶဝ် မွၵ်ႈ 13 လၵ်း၊ ၊ တီႈဝၢၼ်ႈၶဝ်ၼၼ်ႉ ဢမ်ႇလႆႈပဵၼ်ပၢင်တိုၵ်းၵၼ်သေတႃႉ ယွၼ်ႉပိူဝ်ႈ ၶဝ်လႆႈႁၼ် သိုၵ်းတႆး RCSS ႄလႈ SSPP သွင်ၽၢႆႇ မႃးယူႇၸွမ်းႁူၺ်ႈၸွမ်းလွႆလႄႈ ငိၼ်းၵူဝ်ႁေသေ ၸင်ႇလႆႈဢွၼ်ၵၼ်သွင်ႉပၢႆႈမႃး ၊ တင်းသဵင်ႈ မီးမွၵ်ႈ 5 ပၢၵ်ႇပၢႆ ၊ ၵမ်ႈၼမ် ပဵၼ်ၼၢင်းယိင်း လႄႈ လုၵ်ႈဢွၼ်ႇၶဝ် ၼႆယဝ်ႈ ။

မၼ်းၸဝ်ႈသိုပ်ႇလၢတ်ႈထႅင်ႈဝႃႈ ဝၢႆးေသလႆႈငိၼ်းၶၢဝ်ႇဝႃႈ ပီႈၼွင်ႉပၢႆႈပၢင်တိုၵ်း မႃးသေႃႉႁူမ်ႈတီႈ ဝတ်ႉဝၢၼ်ႈလီႈ ၼႆလႄႈ ၸုမ်းပရႁိတၸွႆႈထႅမ်တူင်ႇဝူင်းၵူၼ်းၶဝ်ၼႆၵေႃႈ ဢွၼ်ၵၼ်ၽႅဝ်မႃး ၊ ၵမ်ႈၽွင်ႈၵေႃႈ တိုၵ်ႉဢဝ်ၵႃးမိူဝ်းႁပ်ႉၵူၼ်းဝၢၼ်ႈၶဝ်ထႅင်ႈယူႇ ၊ ၵွပ်ႈၼႆ ၽူႈပၢႆႈပၢင်တိုၵ်း ဢၢပ်ႈတေတိူဝ်းၼမ်မႃးလိူဝ်သေၼႆႉ ၊ ယၢမ်းလဵဝ် တမ်းတီႈယူႇပၼ်ၶဝ်ဝႆႉတီႈၸရွပ်ႈသႃလႃး ၊ တႃႇၵိၼ်တႃႇယႅမ်ႉၵေႃႈ ၸဝ်ႈသြႃႇၵျႂင်းဝၢၼ်ႈလီ လဵင်ႉလူဝႆႉယူႇ ၵူၺ်းၵႃႈ ပေႃးၶဝ်မႃးထႅင်ႈသေ သမ်ႉတေယူႇထႅင်ႈ လၢႆဝၼ်းၼႆႄတႉ တေလူဝ်ႇတၢင်းၸွႆႈထႅမ် တႃႇၵိၼ်တႃႇယႅမ်ႉ ၊ ၵွပ်ႈၼႆ ၽိတ်ႈမွၵ်ႇၽူႈမီးၸႂ်သတ်ႉထႃႇဢီးလူၶဝ် မႃးၸွႆႈထႅမ်ၵၼ် ၼႆၶႃႈယဝ်ႈ ။

တပ်ႉသိုၵ်းၸိုင်ႈတႆး RCSS ၼၼ်ႉ ပဵၼ်ၸုမ်းဢၼ်လူင်းလၢႆးမိုဝ်းလိၵ်ႈႁူမ်ႈမၢႆ လွင်ႈၵိုတ်းယိုဝ်းတူဝ်ႈမိူင်း ( ဢႅၼ်ႇသီႇဢေႇ ) ၸွမ်းၵၼ်တင်းလူင်ပွင်ၸိုင်ႈသေ တပ်ႉသိုၵ်းတႆး SSPP ႄတႉ ပႆႇပႃႈလူင်းလၢႆးမိုဝ်း ၊ ၵူၺ်းၵႃႈၶဝ်ႈပႃးဝႆႉၼႂ်းၸုမ်းဢူၺ်းလီပွတ်းႁွင်ႇ ဢၼ်သိုၵ်းဝ ဢွၼ်ႁူဝ် ။

ၵဵဝ်ႇလူၺ်ႈလွင်ႈလႆႈၶဵင်ႈၶႅင်ပဵၼ်ပၢင်တိုၵ်းတေႃႇၵၼ်မႃးၼႆႉသေ SSPP လၢတ်ႈဝႃႈ RCSS ပူၼ်ႉ ပႅၼ်ၼႃႈလိၼ်/ ၶဝ်ႈမႃးတီႈဢၼ်ၶဝ်တူင်ႉၼိုင်ယူႇလႄႈ ၸင်ႇလႆႈယိုဝ်းၵၼ် ၊ ၽၢႆႇတပ်ႉသိုၵ်း RCSS သမ်ႉဝႃႈ တင်း SSPP ၼႆႉ ဢမ်ႇတွၼ်ႉလႆႈလူင်းလၢႆးမိုဝ်းတႅပ်းတတ်းမၵ်းမၼ်ႈၼႃႈလိၼ်ၽႂ်မၼ်းမႃးသေပွၵ်ႈ ၊ တပ်ႉသိုၵ်းၸိုင်ႈတႆးၼႆႉ တေလႆႈမီးသုၼ်ႇၵႂႃႇမႃးလႆႈ ၼႂ်းမိူင်းတႆးၵူႈတီႈ ၼႆၶႃႈယဝ်ႈ ။