တိုၵ်ႈၵေႃႇသၢင်ႈၵူၼ်ႇပင်း ႁႅင်းၵၢၼ်မိူင်းမၢၼ်ႈ တၢႆ 3 ၵေႃႉ ဝၢတ်ႇၸဵပ်း 8 ၵေႃႉ

ၶၢဝ်ႇထႆး phukethotnews တႅမ်ႈမွၵ်ႇၵႂႃႇဝႃႈ ဝၼ်းထိ 11 လိူၼ်ထူၼ်ႈ 8 ပီ 2019 ၼီႈ မိူဝ်ႈဝႃး ယၢမ်းဝၢႆးဝၼ်း တီႈၼႂ်းပွၵ်ႉ ต.ราไวย์ ဝဵင်းၽူးၵဵတ်ႇ မိူင်းထႆးၼၼ်ႉ ပဵၼ်ၽေးၵိုင်ႉၵၢင်ႉ တိုၵ်ႈၵေႃႇသၢင်ႈၵူၼ်ႇပင်းလူင်းမႃးလႄႈ ႁဵတ်းႁႂ်ႈမီးၵူၼ်းလုတၢႆဝၢတ်ႇၸဵပ်းၵၼ် ။

ၸဝ်ႈၼႃႈတီႈၽၢႆႇၸွႆႈထႅမ်ၽူႈထူပ်းၽေးၽူးၵဵတ်ႇ လၢတ်ႈၼႄၽူႈသိုဝ်ႇၶၢဝ်ႇဝႃႈ တိုၵ်ႈဢၼ်ၵူၼ်ႇပင်းမႃးၼၼ်ႉ ပဵၼ်တိုၵ်ႈဢုတ်ႇ ႁူင်းသဝ်း 3 ၸၼ်ႉဢၼ်မီးၸိုဝ်ႈဝႃႈ VIP GALAXY ။ မိူဝ်ႈဝႃး ယၢမ်းဝၢႆးဝၼ်း မွၵ်ႈ 2 မူင်းပၢႆ ၽွင်းမိူဝ်ႈၵူၼ်းႁဵတ်းၵၢၼ်ၶဝ် တိုၵ်ႉယူႇၼိူဝ်ယၢမ်းလဵၵ်းသေ သိူဝ်ႇပုၼ်သိူဝ်ႇသၢႆးယူႇတီႈၸၼ်ႉသွင်ၼၼ်ႉ ၶၢတ်ႈလၢမ်းဝႃႈ ၼမ်ႉၼၵ်းမၼ်းၼမ်ပူၼ်ႉလႄႈ ႁဵတ်းႁႂ်ႈၶဵင်ႇယၢမ်းလၼ်ႇလူင်းမႃးသေ တိုၵ်ႈဢုတ်ႇၵေႃႈ လူမ်ႉၵူၼ်ႇမႃးၸွမ်း ။ ၵူၼ်းႁဵတ်းၵၢၼ် ဢွၼ်ၵၼ်လႅၼ်ႈပၢႆႈသိုဝ်ႈၽႂ်တၼ်းမၼ်း ။ ၵူၺ်းၵႃႈ ၵမ်ႈၽွင်ႈပၢႆႈဢမ်ႇတၼ်းလွတ်ႈလႄႈ လႆႈလုတၢႆဝၢတ်ႇၸဵပ်းၵၼ် ။ ဢွၼ်တၢင်းသုတ်း မီးၵူၼ်းႁၢႆလၢႆၵႂႃႇတႂ်ႈၵွင်ဢုတ်ႇၵွင်လဵၵ်း 3 ၵေႃႉ ဢၼ်ဝၢတ်ႇၸဵပ်းသမ်ႉ မီး 8 ၵေႃႉ ။ ၸိူဝ်းၶဝ်တင်းသဵင်ႈ ပဵၼ်ႁႅင်းၵၢၼ်မိူင်းမၢၼ်ႈ ။ ၽူႈမီးပုၼ်ႈၽွၼ်းၶဝ် ဢဝ်ၽူႈဝၢတ်ႇၸဵပ်း သူင်ႇၵႂႃႇတီႈႁူင်းယႃ ။

ၽၢႆႇၼိုင်ႈၵေႃႈ ဢွၼ်ၵၼ်ၶူၼ်ႉသွၵ်ႈႁႃဢဝ်ၽူႈဢၼ်ၸူမ်ႁၢႆ ၊ မိူဝ်ႈႁိုင်ထိုင် သွင်ၸူဝ်ႈမူင်း လႆႈႁၼ် တူဝ်တၢႆ ႁႅင်းၵၢၼ်ၵေႃႉၼိုင်ႈ ။ ၸဝ်ႈၼႃႈတီႈၽၢႆႇၸွႆႈထႅမ်ၶဝ် ဢမ်ႇလိုဝ်ႈဢမ်ႇသဝ်းသေ သိုပ်ႇဢဝ် ၶိူင်ႈၸၢၵ်ႈ ထုၺ်လိၼ်ဢၼ်ယႂ်ႇဢၼ်လူင်ၵုၺ်ႉႁႃ ။ ထိုင်မႃးဝၼ်းထိ 12 ယၢမ်းၵၢင်ၼႂ် 2 မူင်းၶိုင်ႈ တီႈၸၼ်ႉတႂ်ႈလိၼ်ၼၼ်ႉ လႆႈႁၼ်ထႅင်ႈ တူဝ်တၢႆၵူၼ်းႁဵတ်းၵၢၼ်ထႅင်ႈၵေႃႉၼိုင်ႈ ၸိုဝ်ႈႁွင်ႉ မိၼ်းၼၢႆႇ ဢႃႇယု 36 ပီ ၊ ယၢမ်းၵၢင်ဝၼ်းၼႆႉသမ်ႉ လႆႈႁူပ်ႉႁၼ်ထႅင်ႈ တူဝ်တၢႆ ၵေႃႉထိ 2 ၸိုဝ်ႈႁွင်ႉဝႃႈ တိၼ်ႇထုၼ်း ဢႃႇယု 36 ပီ ၼင်ႇၵၼ် ၊ မၼ်းၸၢႆးၼႆႉ ၺႃးႁိၼ်ပုၼ်လေႃႇသႂ်ႇၼိူဝ်မၼ်းသေ ႁိၼ်ၵေႃႈသမ်ႉပေႃးၵႅၼ်ႇၶႅင်ယဝ်ႉလႄႈ ၸဝ်ႈၼႃႈတီႈၶဝ် လႆႈဢဝ်ၶိူင်ႈ တတ်းပဵၼ်ပွတ်း ပဵၼ်ပွတ်းသေ ၸင်ႇၸၼ်ဢွၵ်ႇမၼ်းၸၢႆးမႃးလႆႈ ယၢပ်ႇယၢပ်ႇယဵၼ်းယဵၼ်း ၼႆယဝ်ႈ ။